കൽപ്പറ്റ: മാരക മയക്കുമരുന്നായ 9.25 ഗ്രാം മെത്താഫിറ്റമിനുമായി യുവാവ് പോലീസ് പിടിയിൽ. കൽപ്പറ്റ മുണ്ടേരി താന്നിക്കൽ വീട്ടിൽ ടി.കെ വേണുഗോപാൽ (32) നെ യാണ് കൽപ്പറ്റ പൊലീസും ജില്ല ലഹരിവിരുദ്ധ സ്‌ക്വാഡും ചേർന്ന് പിടികൂടിയത്. ഇന്നലെ വൈകുന്നേരത്തോടെ കൽപ്പറ്റക്കടുത്ത വെങ്ങപ്പള്ളി പഞ്ചാബ് മുസ്ലിം പള്ളിക്ക് സമീപത്ത് വെച്ചാണ് പ്രതിയെ പിടികൂടിയത്. പൊലീസിനെ കണ്ടപ്പോൾ പരുങ്ങിയ യുവാവിനെ ചോദ്യം ചെയ്തപ്പോൾ സംശയം തോന്നി പരിശോധന നടത്തുകയായിരുന്നു.
പാന്റ്‌സിന്റെ വലത് പോക്കറ്റിൽ നിന്നുമാണ് 9.25 ഗ്രാം മെത്തഫിറ്റമിൻ കണ്ടെടുത്തത്. വേണുഗോപാൽ മുൻപ് നിരവധി ലഹരിക്കടത്ത് കേസുകളിൽ പ്രതിയായിട്ടുള്ളയാളാണെന്ന് പൊലീസ് പറഞ്ഞു. കൽപ്പറ്റ, മാനന്തവാടി പൊലീസ് സ്‌റ്റേഷനുകളിലും കൽപ്പറ്റ എക്‌സൈസ് ഓഫീസിലും പ്രതിക്കെതിരെ കേസുകളുണ്ട്. കോടതയിൽ ഹാജരാക്കിയ പ്രതിയെ റിമാൻഡ് ചെയ്തു. കൽപ്പറ്റ സബ് ഇൻസ്പെക്ടർ വിമൽ ചന്ദ്രന്റെ നേതൃത്വത്തിലുള്ള സംഘമാണ് പരിശോധന നടത്തിയത്.