കഞ്ചാവ് വില്‍പന ചോദ്യം ചെയ്ത സഹോദരങ്ങളെ ഗുണ്ടാ സംഘം വനപ്രദേശത്ത് കൊന്ന് കുഴിച്ചുമുടി. തൂത്തുക്കുടിയിലാണ് സംഭവം. പണ്ടുകരൈ സ്വദേശി മാരിപാണ്ടി, സഹോദരനും ഭിന്നശേഷിക്കാരനുമായ അരുള്‍രാജ് എന്നിവരാണ് കൊല്ലപ്പെട്ടത്. വീടിന് സമീപം കഞ്ചാവും ലഹരി വസ്തുക്കളും വില്‍ക്കുന്നത് സഹോദരങ്ങള്‍ ചോദ്യം ചെയ്തിരുന്നു. സംഭവം വിവരം പൊലീസില്‍ അറിയിക്കുമെന്ന് താക്കീത് നല്‍കുകയും ചെയ്തിരുന്നു. ഇതിന്റെ പകയില്‍ സംഘം ഇരുവരെയും കഴിഞ്ഞമാസം 27-ന് തട്ടിക്കൊണ്ടു പോയെന്ന് ബന്ധുക്കള്‍ പറഞ്ഞു.
ഇരുവരെയും കാണാതായതോടെ ബന്ധുക്കള്‍ പൊലീസില്‍ പരാതി നല്‍കി. തുടര്‍ന്ന് പൊലീസും നാട്ടുകാരും ചേര്‍ന്ന് നടത്തിയ അന്വേഷണത്തിലാണ് സമീപത്തെ വനപ്രദേശത്ത് കുഴിച്ചിട്ട നിലയില്‍ മൃതദേഹങ്ങള്‍ കണ്ടെത്തിയത്. സംഭവത്തില്‍ മൂന്ന് പേര്‍ പിടിയിലായി. മറ്റുരണ്ട് പേര്‍ക്കായി അന്വേഷണം ശക്തമാക്കിയിട്ടുണ്ടെന്ന് പൊലീസ് വ്യക്തമാക്കി.