തേനി : മരിച്ച വയോധികയുടെ കഴുത്തില്‍ കിടന്ന മാല മോഷ്ടിച്ച പ്രതി പിടിയില്‍. തമി‍ഴ്നാട് സര്‍ക്കാര്‍ മെഡിക്കല്‍ കോളജ് ആശുപത്രിയിലേക്കുള്ള യാത്രാമധ്യേയാണ് വയോധിക മരിച്ചത്. മരിച്ച വയോധികയുടെ കഴുത്തില്‍ കിടന്ന നാലര പവന്റെ സ്വര്‍ണമാല അത്യാഹിതവിഭാഗത്തില്‍ വച്ചു മോഷ്ടിച്ച സംഭവത്തില്‍ തേനി രംഗപ്പട്ടി സ്വദേശിനി നന്ദിനിയാണ് അറസ്റ്റിലായത്.
തേനി ജില്ലയിലെ ബോഡിനായ്ക്കന്നൂരിനടുത്ത് എസ്എസ് പുരം പ്രദേശത്തെ രാമസാമിയുടെ ഭാര്യ കമലം (82) ആംബുലന്‍സില്‍ ആശുപത്രിയിലേക്കു പോകും വഴിയാണ് മരിച്ചത്. ഇവിടെ 802-ാം മുറിയില്‍ സൂക്ഷിച്ചിരുന്ന മൃതദേഹത്തില്‍ നിന്നാണ് മാല മോഷണം പോയത്.
പൊലീസ് നടത്തിയ അന്വേഷണത്തില്‍ ബന്ധുവിന്റെ ചികിത്സയുമായി ബന്ധപ്പെട്ട് ആശുപത്രിയില്‍ എത്തിയ നന്ദിനിയാണ് മോഷണം നടത്തിയതെന്നു വ്യക്തമായി. മാല നഷ്ടമായതു സംബന്ധിച്ച് കമലത്തിന്റെ മരുമകന്‍ പൊലീസില്‍ പരാതി നല്‍കി. സിസിടിവി ദൃശ്യങ്ങള്‍ പരിശോധിച്ചപ്പോള്‍ യുവതി മാല മോഷ്ടിക്കുന്നതിന്റെ ദൃശ്യങ്ങള്‍ ലഭിച്ചു.
