സുൽത്താൻ ബത്തേരി: വനിത പൊലീസ് ഓഫീസർമാർക്കെതിരെ വാട്സാപ്പ് ഗ്രൂപ്പിൽ ലൈംഗിക അധിക്ഷേപം നടത്തിയ ശേഷം മുങ്ങിയ വയോധികനെ മൈസൂരിൽ നിന്ന് പിടികൂടി. ബത്തേരി മൂലങ്കാവ് കോറുമ്പത്ത് വീട്ടിൽ മാനു എന്ന അഹമ്മദി (61) നെയാണ് ബത്തേരി പൊലീസ് പിടികൂടിയത്. വനിതാ സിവിൽ പൊലീസ് ഓഫീസറുടെ പരാതിയിലാണ് ഇയാൾക്കെതിരെ നടപടി എടുത്തത്.
അതേസമയം ബത്തേരി, മീനങ്ങാടി, അമ്പലവയൽ സ്റ്റേഷനുകളിലായി ഇയാൾക്കെതിരെ ആറ് കേസുകളുള്ളതായി പൊലീസ് വ്യക്തമാക്കി. ജൂൺ 30 നാണ് എഴുന്നൂറോളം പേർ അംഗമായ ‘മൊട്ടുസൂചി’ എന്ന വാട്സാപ്പ് ഗ്രൂപ്പിൽ ഇയാൾ ജില്ലയിലെ ഒരു പൊലീസ് സ്റ്റേഷനിലെ വനിതാ സിവിൽ പൊലീസ് ഓഫീസർമാർക്കെതിരെ ലൈംഗിക അധിക്ഷേപം നടത്തിയത്. സ്ത്രീകൾക്കും പൊലീസ് സേനയ്ക്കും അവമതിപ്പ് ഉണ്ടാകുന്ന തരത്തിൽ ലൈംഗികചുവയുള്ള വോയ്‌സ് മെസ്സേജ് ആണ് ഇയാൾ ഗ്രൂപ്പിൽ അയച്ചത്.
സംഭവത്തിൽ ജൂലൈ ഒന്നിന് ഇയാൾക്കെതിരെ കേസെടുക്കുകയും ഇയാൾ ഒളിവിൽ പോകുകയുമായിരുന്നു. ബത്തേരി പൊലീസ് ഇൻസ്‌പെക്ടർ എൻ.പി രാഘവൻ, എസ്.ഐ സോബിൻ, എ.എസ്.ഐ സലീം, സീനിയർ സിവിൽ പൊലീസ് ഓഫീസറായ ലബ്‌നാസ്, സിവിൽ പൊലീസ് ഓഫീസർമാരായ അനിൽ, അനിത് എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്തത്.