അഹമ്മദാബാദ് വിമാന അപകടത്തിനു ശേഷം നിര്‍ത്തിവച്ച എയര്‍ ഇന്ത്യ സര്‍വീസുകള്‍ ഭാഗികമായി പുനസ്ഥാപിക്കും. ആഗസ്റ്റ് ഒന്ന് മുതല്‍ പല അന്താരാഷ്ട്ര സര്‍വീസുകളും പുനരാരംഭിക്കും എന്നാണ് അറിയിപ്പ്. ഒക്ടോബര്‍ 1 മുതല്‍ പൂര്‍ണമായും പുനസ്ഥാപിക്കുമെന്നും എയര്‍ ഇന്ത്യ പ്രസ്താവനയില്‍ അറിയിച്ചു.
ജൂണ്‍ 12ന് അഹമ്മദാബാദ് വിമാനത്താവളത്തില്‍ നിന്ന് പറയുന്നയര്‍ന്നതിന് പിന്നാലെ എഐ 171 വിമാനം തകര്‍ന്നതോടെയാണ് എയര്‍ ഇന്ത്യ പല സര്‍വീസുകളും നിര്‍ത്തി വച്ചത്. അപകടത്തില്‍ ജീവനക്കാരടക്കം 260 പേര്‍ക്ക് ജീവന്‍ നഷ്ടമായി. ബോയിംഗ് 787 ഡ്രീംലൈനര്‍ വിമാനം വിമാനത്താവളത്തിന് സമീപമുള്ള ഒരു ഹോസ്റ്റലിലേക്ക് ഇടിച്ചുകയറുകയായിരുന്നു.
ബോയിംഗ് 787 വിമാനങ്ങളില്‍ അധിക മുന്‍കരുതല്‍ പരിശോധനകള്‍ നടത്തുന്നതിനായാണ് താല്‍ക്കാലിക സര്‍വീസ് നിര്‍ത്തിവെക്കല്‍ നടത്തിയത് എന്ന് ടാറ്റാ ഗ്രൂപ്പിന്റെ ഉടമസ്ഥതയിലുള്ള വിമാന കമ്പനി പ്രസ്താവനയില്‍ വ്യക്തമാക്കി.
