ചെന്നൈ : ചെന്നൈയിൽ കുടുംബവഴക്കിനെത്തുടർന്ന് കൗൺസിലറെ ഭർത്താവ് വെട്ടിക്കൊലപ്പെടുത്തി. ചെന്നൈ വെസ്റ്റേൺ സബ്അർബിലെ തിരുവള്ളൂർ ജില്ലയിലെ തിരുനിന്ദ്രാവൂർ മുൻസിപ്പാലിറ്റിയിലെ കൗൺസിലറായ ഗോമതി(38)യെയാണ് ഭർത്താവ് സ്റ്റീഫൻ രാജ് കൊലപ്പെടുത്തിയത്. വെള്ളിയാഴ്ചയായിരുന്നു സംഭവം. വിസികെ പാർടി അംഗങ്ങളാണ് ഗോമതിയും ഭർത്താവും.
തിരുനിന്ദ്രാവൂരിലെ പെരിയാർ കോളനിയിലെ വീടിനടുത്ത് വെച്ചാണ് സ്റ്റീഫൻ ഗോമതിയെ മാരകമായി വെട്ടി പരിക്കേൽപ്പിച്ചത്. കുറച്ചുനാളുകളായി ഇവർ തമ്മിൽ പ്രശ്നങ്ങളുണ്ടായിരുന്നുവെന്ന് ബന്ധുക്കൾ പറഞ്ഞു. സംശയമാണ് കൊലയ്ക്ക് കാരണമെന്നാണ് പ്രാഥമിക നിഗമനം. രക്തത്തിൽ കുളിച്ച നിലയിലാണ് ഗോമതിയെ പൊലീസ് കണ്ടെത്തിയത്. കൊലയ്ക്ക് ശേഷം രാജ് പോലീസിൽ കീഴടങ്ങിയതോടെയാണ് വിവരം പുറത്തറിഞ്ഞത്. പത്തുവർഷം മുമ്പാണ് ഇരുവരും വിവാഹിതരായത്. സംഭവത്തിൽ അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.
