അഞ്ചരക്കണ്ടി : കാവിൻ മൂലയിൽ നിന്നും പാനേരി ചാലിലേക്ക് എളുപ്പത്തിൽ പോകാവുന്ന കനാൽ റോഡ് തകർന്ന് തരിപ്പണമായി. പേരിന് മാത്രമാണോ ഇവിടെ ടാറിങ്ങുള്ളത്. രണ്ടു കിലോമീറ്റർ റോഡിൽ നിറയെ വൻ കുഴികളാണുള്ളത്. മഴ ശക്തമായാൽ ഈ കുഴിയിൽ വെള്ളം നിറയുന്നതിനാൽ ഇരുചക്ര വാഹന യാത്രക്കാർ അപകടത്തിൽപ്പെടുന്നത് പതിവാണ്.
നിത്യേനെ നിരവധിയാളുകൾ ദർശനം നടത്താറുള്ള പലേരി ക്ഷേത്രം, അഞ്ചരക്കണ്ടി ഹയർ സെക്കൻഡറി സ്കൂൾ, വില്ലേജ് ഓഫിസ് എന്നിവടങ്ങളിലേക്ക് എളുപ്പത്തിൽ പോയി വരാനുള്ള റോഡാണിത്. നിത്യേനെ വലിയ വാഹനങ്ങൾ ഉൾപ്പെടെ ഇതിലൂടെ സഞ്ചരിക്കുന്നുണ്ട്. പഴശി കനാലിന് ബൈപാസായി 40 വർഷം മുൻപെ നിർമ്മിച്ച റോഡാണിത്. താഴെ കാവിൻ മൂലയിൽ ഇരിവേരി വായനശാല സ്ഥിതി ചെയ്യുന്ന ചക്കരക്കൽ - തലശേരി റോഡിൽ ചെന്നു മുട്ടുന്ന റോഡാണിത്.
ചക്കരക്കൽ ടൗണിലുള്ള ഗതാഗത കുരുക്ക് ഒഴിവാക്കാനാണ് മിക്കവാഹനങ്ങളും ഇതിലൂടെ സഞ്ചരിക്കുന്നത്. മെയിൻ റോഡ് മുറിച്ചു കടന്നാൽ നേരെ പൊതുവാച്ചേരി വഴി കണ്ണൂർ, തലശേരി ഭാഗങ്ങളിലേക്ക് പോകാം. കഴിഞ്ഞ വേനൽ കാലത്ത് കനാൽ വൃത്തിയാക്കി ജലസേചനം ഇറിഗേഷൻ വകുപ്പ് നടത്തിയെങ്കിലും റോഡിൻ്റെ അറ്റകുറ്റപ്പണി പഞ്ചായത്തോ ഉത്തരവാദിത്വപ്പെട്ട മറ്റുളളവരോ നടത്തിയില്ല. അതുകൊണ്ടുതന്നെ
റോഡിൻ്റെ സ്ഥിതി ശോച്യാവസ്ഥയിൽ തന്നെ തുടരുകയാണ്.