പശ്ചിമബംഗാള്‍ മുഖ്യമന്ത്രി മമത ബാനര്‍ജി പ്രധാനമന്ത്രിമാരെ കുറിച്ച് പുസ്തകം എഴുതുന്നു. രാജ്യത്തെ വിവിധ പ്രധാനമന്ത്രിമാരുമായുള്ള മമതയുടെ വ്യക്തിപരമായ ഓര്‍മ്മകളാകും പുസ്തകമാകുക. അടുത്ത വര്‍ഷം നടക്കുന്ന കൊല്‍ക്കത്ത പുസ്തക മേളയില്‍ പുസ്തകം പ്രകാശനം ചെയ്യും. പല പ്രധാനമന്ത്രിമാരുമായും താന്‍ വളരെ അടുത്തുനിന്ന് പ്രവര്‍ത്തിച്ചിട്ടുണ്ടെന്നും ഇത് അവരെ കുറിച്ച് എഴുതാനുള്ള സമയമാണെന്നും മമത പറഞ്ഞു.
നാല് പതിറ്റാണ്ടിലേറെ രാഷ്ട്രീയ പരിചയമുള്ള മമത ബാനര്‍ജി, രാജീവ് ഗാന്ധി മുതല്‍ മന്‍മോഹന്‍ സിംഗ് വരെയുള്ള നിരവധി പ്രധാനമന്ത്രിമാരുമായി അടുത്ത് പ്രവര്‍ത്തിച്ചിട്ടുള്ള ചുരുക്കം ചില സജീവ നേതാക്കളില്‍ ഒരാളാണ്. കോണ്‍ഗ്രസ് വിട്ട ശേഷം അടല്‍ ബിഹാരി വാജ്‌പേയി നയിച്ച എന്‍ഡിഎ ഭരണത്തിന്‍ കീഴില്‍ പോലും മമത സേവനമനുഷ്ഠിച്ചിട്ടുണ്ട്.
'എട്ട് തവണയാണ് കേന്ദ്ര മന്ത്രിയായിട്ടുള്ളത്. റെയില്‍വേ, കല്‍ക്കരി, വനിതാ-ശിശുക്ഷേമം തുടങ്ങി സുപ്രധാന വകുപ്പുകള്‍ കൈകാര്യം ചെയ്തിട്ടുണ്ട്. ഞാന്‍ കണ്ടതും അടുത്തറിയുന്നതുമായ കാര്യങ്ങള്‍ എഴുതും' മമത പറയുന്നു. കാര്യങ്ങളെ കുറിച്ച് വെട്ടിത്തുറന്ന് സംസാരിക്കാറുള്ള മമതയുടെ പുസ്തകവും സമാന രീതിയിലായിരിക്കുമോയെന്നാണ് ചര്‍ച്ച.