തിരുവനന്തപുരം: തെറ്റായ ഒരു പ്രവണതകള്‍ക്ക് മുന്നിലും പാര്‍ട്ടി കീഴടങ്ങില്ലെന്ന് സിപിഐഎം സംസ്ഥാന സെക്രട്ടറി എം.വി.ഗോവിന്ദന്‍. തെറ്റായ ഒന്നിനെയും അംഗീകരിക്കില്ല. അത് കേഡര്‍മാര്‍ക്കും പാര്‍ട്ടിക്കാകെയും ബാധകമാണ്. തെറ്റായ കാര്യങ്ങള്‍ക്കെതിരായ പാര്‍ട്ടി നടപടികള്‍ നിരന്തര പ്രക്രിയയാണെന്നും എം.വി.ഗോവിന്ദന്‍ പറഞ്ഞു.
മുതലാളിത്ത സമൂഹത്തില്‍ പ്രവര്‍ത്തിക്കുന്നത് കൊണ്ടാണ് തെറ്റായ പ്രവണതകള്‍ പാര്‍ട്ടിക്കകത്തേക്ക് കടന്നുകൂടുന്നത്. പണത്തോടുളള ആര്‍ത്തിയും പണം ഉണ്ടാക്കാനായി പാര്‍ട്ടിയിലേക്ക് കടന്നുവരുന്നതുപോലുളള പ്രവണതകള്‍ അങ്ങനെയാണ് സംഭവിക്കുന്നത്.എന്നാല്‍ അതിനോടൊന്നും വിട്ടുവീഴ്ചയില്ലെന്നും അദ്ദേഹം പറഞ്ഞു.
തെറ്റായ കാര്യങ്ങള്‍ക്കെതിരായ പാര്‍ട്ടിയിലെ ചര്‍ച്ചയും നടപടികളും നിരന്തരമായ പ്രക്രിയയാണ്. പാര്‍ട്ടിക്കകത്ത് നടക്കുന്ന ചര്‍ച്ചകളും മറുപടിയും നടപടികളും എല്ലാം നവീകരണ പ്രക്രിയയാണെന്നും എം.വി.ഗോവിന്ദന്‍ കൂട്ടിച്ചേര്‍ത്തു.
