2025 സാമ്പത്തിക വര്‍ഷത്തിലെ ആദ്യ പാദത്തിന്റെ അവസാനത്തോട് കൂടി കുവൈത്തിലെ ഗാര്‍ഹിക തൊഴില്‍ മേഖലയിലെ തൊഴിലാളികളുടെ എണ്ണത്തില്‍ ഗണ്യമായ കുറവാണ് അനുഭവപ്പെട്ടത്. വിദേശ തൊഴിലാളികളില്‍ 25.2 ശതമാനത്തോളം പങ്ക് വഹിക്കുന്ന ഈ വിഭാഗത്തിലെ തൊഴിലാളികളുടെ എണ്ണം ഇപ്പോള്‍ ഏകദേശം 745,000 ആയി കുറഞ്ഞതായി കണക്കുകള്‍ വ്യക്തമാക്കുന്നു. 2024 ആദ്യ പാദത്തിലെ അപേക്ഷിച്ച് ഇത് 5.6 ശതമാനം കുറഞ്ഞതായാണ് റിപ്പോര്‍ട്ട്.
ഇതില്‍ ഏകദേശം 415,000 സ്ത്രീകളും 330,000 പുരുഷരുമാണ് ഉള്‍പ്പെടുന്നത്. വനിത തൊഴിലാളികളില്‍ ഫിലിപ്പീന്‍സുകാരാണ് ഏറ്റവും മുന്നില്‍. നിലവില്‍ 131,000 ഫിലിപ്പീനോ വനിതകള്‍ ഗാര്‍ഹിക മേഖലയിലാണ് ജോലി ചെയ്യുന്നത്. പക്ഷേ കഴിഞ്ഞ വര്‍ഷം ഇത് 175,000 ആയിരുന്നു.
പുരുഷ തൊഴിലാളികളെ നോക്കുമ്പോള്‍, ഇന്ത്യക്കാര്‍ മുന്നിലാണ്. ഏകദേശം 213,000 ഇന്ത്യന്‍ പുരുഷന്മാരാണ് ഈ മേഖലയില്‍ സജീവം, എന്നാല്‍ 2024 ആദ്യ പാദത്തില്‍ ഇത് 248,000 ആയിരുന്നു. ആകെ ഗാര്‍ഹിക തൊഴില്‍ മേഖലയില്‍ ഇന്ത്യക്കാരാണ് ഏറ്റവും വലിയ വിഭാഗം മൊത്തം തൊഴിലാളികളുടെ 42.2 ശതമാനവും ഇന്ത്യക്കാരാണ്. ശ്രീലങ്കയും ഫിലിപ്പീന്‍സും പിന്നിലാണ്.
