യുഎസ് സര്‍ക്കാരിന്റെ കാര്യക്ഷമത വിഭാഗമായ ഡോജിന്റെ ചുമതലയില്‍ നിന്ന് താന്‍ പിന്മാറുകയാണെന്ന് അറിയിച്ച് ടെസ്ല സിഇഒ ഇലോണ്‍ മസ്‌ക്. ടെസ്ലയുടെ ലാഭത്തില്‍ 71 ശതമാനം ഇടിവുണ്ടായ പശ്ചാത്തലത്തിലാണ് മസ്‌കിന്റെ പ്രഖ്യാപനം. നിക്ഷേപകരുമായുള്ള ഒരു മീറ്റിംഗിലാണ് താന്‍ ഡോജിലെ പ്രധാന ചുമതലകള്‍ അടുത്ത മാസം വേണ്ടെന്ന് വയ്ക്കുകയാണെന്ന് മസ്‌ക് അറിയിച്ചത്.
2025ലെ ആദ്യപാദത്തില്‍ ടെസ്ലയുടെ വരുമാനത്തില്‍ 9 ശതമാനം ഇടിവാണ് രേഖപ്പെടുത്തിയത്. 21.45 ബില്യണ്‍ ഡോളര്‍ വരുമാനം പ്രതീക്ഷിച്ചിടത്ത് 19.3 ബില്യണ്‍ ഡോളര്‍ മാത്രമാണ് ടെസ്ലയ്ക്ക് നേടാന്‍ സാധിച്ചത്. വാഹനങ്ങള്‍ ഡെലിവര്‍ ചെയ്യുന്നതില്‍ 13 ശതമാനം ഇടിവാണ് രേഖപ്പെടുത്തിയിരിക്കുന്നത്. 2025ലെ ആദ്യപാദത്തില്‍ ടെസ്ലയ്ക്ക് ഡെലിവര്‍ ചെയ്യാന്‍ സാധിച്ചത് 336681 വാഹനങ്ങളാണ്. 2022ന് ശേഷമുള്ള ടെസ്ല കമ്പനിയുടെ ഏറ്റവും മോശം പ്രകടനമാണിത്.
