പാകിസ്ഥാനില്‍ നവദമ്പതികളെ വെടിവെച്ച് കൊലപ്പെടുത്തുന്ന ഞെട്ടിക്കുന്ന വീഡിയോ കഴിഞ്ഞ ദിവസമാണ് പുറത്തുവന്നത്്. കുടുംബത്തിന്റെ അനുമതിയില്ലാതെ വിവാഹം കഴിച്ചതിനാലുള്ള ദുരഭിമാനക്കൊലയാണിതെന്നാണ് പൊലീസിനെ ഉദ്ധരിച്ച് വിവിധ വാര്‍ത്താ ഏജന്‍സികള്‍ റിപ്പോര്‍ട്ട് ചെയ്യുന്നത്. വീഡിയോ വ്യാപകമായി പ്രചരിക്കുകയും രാജ്യത്ത് വലിയ പ്രതിഷേധത്തിന് ഇടയാക്കുകയും ചെയ്തിട്ടുണ്ട്. സംഭവവുമായി ബന്ധപ്പെട്ട് 11 പ്രതികളെ പാകിസ്ഥാന്‍ പൊലീസ് അറസ്റ്റ് ചെയ്യുകയും ഉണ്ടായി.
എന്നാല്‍ തന്നെ കൊലപ്പെടുത്തുന്നതിന് മുമ്പ് ആ യുവതി വിളിച്ചുപറഞ്ഞതിനെ കുറിച്ചുള്ള ചില റിപ്പോര്‍ട്ടുകളും പുറത്തുവുന്നു. വീഡിയോയില്‍, പര്‍വതപ്രദേശത്ത് പിക്ക്അപ്പ് ട്രക്കുകളില്‍ നിരവധി പേര്‍ ഒരുമിച്ച് എത്തുന്നത് കാണാം. പ്രാദേശിക ഭാഷയില്‍ സംസാരിക്കുന്ന യുവതി താന്‍ നിയമപരമായി വിവാഹിതയാണെന്ന് പറയുന്നു. ' വരൂ, നിങ്ങള്‍ക്ക് എന്നെ വെടിവെക്കാം കൊല്ലാം, അതിന് മാത്രമേ കഴിയൂ,' എന്നാണ് യുവതി പറയുന്നത്.
കൊല്ലപ്പെട്ട ദമ്പതികള്‍ ബാനോ ബീബിയും അഹ്‌സാന്‍ ഉല്ലയുമാണെന്ന് തിരിച്ചറിഞ്ഞിട്ടുണ്ട്. എന്നാല്‍ സംഭവത്തില്‍ ഒരാളും ഇതുവരെ പരാതി നല്‍കാന്‍ മുന്നോട്ട് വന്നിട്ടില്ല. വൈറലായ വീഡിയോ പരിശോധിച്ച് ദൃശ്യങ്ങളുടെ ആധികാരികത പൊലീസ് സ്ഥിരീകരിച്ചു.
പകല്‍ വെളിച്ചത്തില്‍, നിരവധി ആളുകള്‍ നോക്കിനില്‍ക്കെ ഒരു യുവാവ് നവദമ്പതികളെ വെടിവെച്ച് കൊല്ലുന്നതാണ് വിഡോയിലുള്ളത്.